Azenario pastela (Carrot cake)

Azken egunotan hitz bat darabilkit buruan bueltaka: Hygge

Zer da hygge? Danimarkatik datorren kontzeptua da, bertako kulturan errotuta dagoena. Hitz honek ez du itzulpenik eta definizio azkar bat emateko, bizitzak eskaintzen dizkizun plazer txikiekin disfrutatzeko gaitasuna izango litzateke: lagunak, familia, domeketako gosaria familian, liburu bat irakurtzea euriak lehioa jotzen duen bitartean, lanegun baten ondoren etxera iritsi eta ardo kopatxo bat hartzen duzun bitartean afaria prestatzea, goxotasuna, bizipoz lasaia.

Denok sentitu dugu hyggea, ez diogu izenik jarri baina hor dago, edozein momentu eta bazterretan. Blog honek hygge sortzaile izan nahi du, eta azenario pastel hau baino Hyggeagorik, ba al dago? 

Moleskine errezeta-liburuan idatzi nuen lehendabiziko errezeta izan zen azenario pastelarena. Askotan egiten dut, jende mordoak probatu eta flipatu egin dute. Batzuek, azenarioa duela ikustea arraroa egiten zaie baina probatutakoan aurpegi aldaketa nabarmena izaten da.  Agian, irudituko zaizue osagai asko dituela baina egiterako orduan prestaketa oso sinplea da, lanik "zailena" azenarioak birrintzea dela esango nuke. Sobratuko zaizkizuen osagaiengatik lasai, zin dagizuet pastel hau behin eta berriz egingo duzuela. Erabiliko dugun irina legamiarik behar ez duena da, legamia baduelako irin horrek, paketean "bizkotxoak egiteko berezia" dela jarriko du. Baina, aukera dago ohiko irina erabili eta royal botatzeko.

Goazen imaginatzera hygge momentu bat pastel honekin: igande goizean esnatu eta aurreko egunean egindako pastelak utzi duen kanela usaina nabarmena da. Euria ari du kanpoan. Sukaldera joan eta irratian liburuei buruzko programa bat entzuten hasten zara kafea prestatzen duzun bitartean. Nahastu egiten dira kanela eta kafe usain gozoak. Mahaia prestatu eta familian gosaltzen duzue eguneko planak egiten dituzuen bitartean: ikusiko duzuen filma, adibidez. Eta, zergatik ez? Kandela batzuk pizten dituzue momentu horri goxotasun berezi bat emateko. Bakarrik nagoenean, liburu bat irakurtzen dudan bitartean gosaltzea, hori bai hygge.

Konbentzituta? Goazen errezetarekin!

Errezeta: Azenario pastela

Osagaiak

175 ml ekilore-olio

135 g azukre beltz

3 arrautza (irabiatuta)

175 g azenario birrindu

85 g mahaspasa

50 g intxaur (txikituta)

Laranja baten azala (birrinduta)

175 g irin (legamiarik behar ez duena)

Koilaratxokada bat sodio bikarbonato

Koilaratxokada bat kanela-hauts

½ koilaratxokada intxaur muskatu hauts

Glasatuarentzat:

200 g gazta (philadelphia motakoa)

100 g azukre-hauts

2 koilaratxokada laranja zuku

Prestaketa:

1. OSAGAI LIKIDOAK NAHASTU

Labea piztu 180 graduan. Olioztatu 20-23 cm diametroko molde bat, guk kasu honetan, 23x10 cmko molde laukizuzen bat erabili dugu. Katilu handi batean irabiatu olioa, azukrea eta arrautzak. Gehitu azenarioa, mahaspasak, intxaurrak eta laranja azal birrindua.

2. GEHITU OSAGAI LEHORRAK

Iragazi irina, bikarbonatoa, kanela eta intxaur muskatu hautsa osagai likidoen nahasketaren gainean.

3. NAHASTU

Egurrezko espatula edo koilara batekin nahastu kontuz, mugimendu bilgarriekin eta  gehiegi mugitu gabe, ez da komeni gehiegi nahastea. Irin arrastorik ikusten ez duzunean pasatu nahasketa moldera eta egosi 35 minutuz edo eginda dagoela ikusi arte (sartu labana eta garbi ateratzen denean eginda egongo da). Atera labetik eta utzi moldearen barruan hozten 10 minutuz. Atera moldetik eta utzi hozten.

4. GLASATUA PRESTATU

Nahastu gazta, azukre-hautsa eta laranja zukua sardexka batekin nahasketa homogeneo bat lortu arte. Bota bizkotxoaren gainera eta espatula batekin estali bizkotxoaren goi partea.

Txokolate, oreo eta gerezi cheesecake-a

Gora gereziak! Gainera gereziei hezurra kentzeko tramankulua daukadanez aprobetxatu egin behar...errezeta hau labea piztu gabe egiten da. Momentu batean egiten da eta, gainera, kristalezko ontzitxoetan eraman egin daitezke, adibidez lagunekin bazkari batera edo egun pasa kanpora bazoaz. Maitemindu egin naiz, bai, maitemindu nahasketa batekin (zer?!). Txokolatea, oreoak nori ez zaizkio gustatzen? Baina errezeta honek duen onena, gainean duen topping-a -gerezi tartarako betegarria- da dudarik gabe. Ingalaterran bizi nintzenean probatu nuen horrelako opil bat eta barrutik gerezi mermelada zeukan, mokadu bat eman eta zapore hura ez nuen ahaztu. Handik aurrera saiatu nintzen berriz bueltatzen zapore hartara; gerezi mermeladak egin eta erosi nituen eta ezer. Duela urtebete edo, almendra esentzia erosi nuen "Angel food" bizkotxoa egiteko (aurrerago jarriko dut errezeta). Eta orduan konturatu nintzen hura izan zitekeela zapore hark zeukan osagaietariko bat, urte bete pasa eta gerezi tarta betegarri hau egin, bi osagai horiek nahastu eta...eureka! Flashbacka izan nuen 21 urterekin Hertfordshireko herri batean parkeko banku batean eserita mermeladaz beteriko opil hura jaten ikusi nuen nire burua. Beraz, hau nire koadernotxo berezian apuntatuko dut eta orain, irrikitan nago gerezi tarta (Cherry pie) egiteko, baina hori beste kapitulu baterako utziko dugu.

Almendra esentzia aurkitzea ez da erraza, nik internet bidez erosten dut,adibidez hemen  

Clafoutis-a

Tartetxo bat dudanean saiatzen naiz blogari hobekuntzak egiten, oraingoan sare sozialen linkak sartu ditut, beraz, instagram, twitter edo facebook bidez jarraitu nazakezue. Tok tok! Norbaitek hau irakurtzen badu erakusteko hankatxoa! Bueno eta dudarik baduzue idatzi; errezeta egiten duzuenoi mezua: pozez saltoka hasiko naiz argazkiak bidaltzen badizkidazue! Edo agian nahi duzue errezetaren bat egiten erakustea, prest naukazue horretarako.

Gerezi garaia da eta alde guztietan ikusten ditut. Saioan sasoikoa erabiltzea erabaki ona izaten da: produktuak momentu eta prezio onenean egoten baitira. Joan den urtean gereziei hezurrak kentzeko tramankulu bat erosi nuen, badakit, nahiko frikia da,  ez pentsa, txispak ateratzen dizkiot! Baina ez konplikatu, Clafoutis-a egin daiteke gereziei hezurrak utzita- berez, jatorrizko errezetak horrela egin behar dela dio- batzuek esaten dute hezurrek beste zapore berezi bat ematen diotela Clafoutis-ari, bada, egin eta kontatuko didazue! Ikusiko duzue flanaren antza duela, beste fruitu batzuk ere erabili daitezke hau egiteko, sagarra, madaria, okaranak...

Oso azkar eta erraz egiteko errezeta da, pentsatu gabe, ziur nago hor dituzuela gerezi batzuk, hartu eta egin! Gutxiago dituzuela, ba gutxiagorekin, beste fruitu batzuk sartu nahi dituzuela, aurrera! Eta gero banilla helatu bolatxo batekin, très délicieux egongo da.

Errezeta: Clafoutis-a

Basoko fruituen Crumblea

Gure herriko parkea zoragarria da baina ez gaude ohituta bertako belarra zapaltzera, hau da, bankuetan jartzeko ohitura handia dugu baina gutxitan eramaten dugu mantatxo bat belarretan jartzeko. Honek,  Donostian egiten den musika parkean egitasmoa dakarkit gogora."Por favor ¡pisad la hierba!" lelopean Miramar jauregiko parkean kontzertuak eta piknika antolatzen dute. Helburua da hiriko espazioei beste erabilera bat ematea, hau da, agian urrunetik begiratu izan diren espazio horiek eta gutxi erabili eta "ukitu" ez direnak bizitako espazioak bilakatzea. Gure herriko parkean ere egin izan da kontzerturen bat uda partean,  manta+patata tortilla edo quichea + basoko fruituen crumblearekin hobeto, ezta? Nik piknikeko saskitxo bat daukat ia estreinatu gabe! Guzti hau bururatu zitzaidan joan den egunean, alaba eta biok parkean geundela, eguna libre hartu genuen "nesken eguna" ospatzeko; parkean jolastu eta irakurri Lucía En Londres (Impedimenta) ,1927an argitaratua, parkean irakurtzeko bikaina!, bazkari goxoa jan (postrerako Crumblea), Coraline filma alabarekin ikusi eta lagunekin bueltatxoa eman. Nolako poztasuna ematen duten egun luze hauek!

Gaurko postrea edozein egunetan jan daiteke, osagai osasuntsuak eta kaloria gutxi izateaz gain, oso goxoa da. Ikusiko duzue stevia hostoak erabili ditudala. Stevia azukrearen ordezkoa da, kontuz, askotan erosten dugunak stevia kopuru oso baxua dauka, %1 edo gutxiago. Hostoak erosi nituen %100 stevia izateaz gain, oso merkea iruditu zitzaidalako. Hostoekin egin dudana zera izan da, kafe-errota batekin birrindu eta, honela. hauts antzeko bat lortuko dugu argazkian ikusten den bezalakoa.

Basoko fruituak Lidlen erosi nituen, izoztutako produkuen tokian saltzen dituzte, oso onak izaten dira eta, gainera, prezio aldetik ondo daude. Nik mermelada egiteko ere erabiltzen ditut. Erabiltzeko desizozten utzi beharko dituzu.

Errezeta: Basoko Fruituen Crumblea

Txokolate pipitadun gaileta bigunak

Sukaldaritza eta errezeta- liburuak erostea bizio bat da niretzat  baina ez dut edozein liburu erosten. Askotan gaztelaniaz ez dira argitaratzen erakargarrienak iruditzen zaizkidanak, beraz, ingelesez erosten ditut eta garesti samarrak direnez bigarren eskuko online dendetan merkeago lortzen saiatzen naiz. Joan den egunean Donostian izan nintzen egun pasa eta beti bisitatzen dut liburu-dendaren bat, ba errezeta liburu batekin bueltatu nintzen, horrela "aloloko". Edizio aldetik ez zuen xarma handirik, "Postres saludables. Las recetas más fit" izenburuarekin, uff eztakit ba. Hala ere, barruan begiratzen hasi eta errezeta interesgarriak ikusi nituen, beraz, baditut buruan hainbat gauza "fit" egiteko. Baina hau ez da bikini operazioa, ez gaizki ulertu, gauza berriak probatzeaz ari naiz. Eta dagoeneko erosi dut osagai arraro bat: Chia haziak, momentuz hor daude, despentsan, amaranto eta polentaren ondoan euren ordua noiz iritsiko zain. 

Oharra: Gaurko gailetak ez dira "fit".

Gaileta hauek ohiko cookie amerikarrak dira. Kanpotik gogorrak eta barrutik bigunak "chewy cookies" izenekoak. Nik bi txokolate mota hauek erabili ditut baina egin daitezke batekin, edo txokolate zuriarekin. Etxean gaileta mordoa egiten ditugu, mota desberdinetakoak, Telmo eta Miren gaileta dastatzaile profesionalak dira eta gaileta hauek "munduko onenak!" direla diote. Beraz, lagun maiteok, labea piztu!

Errezeta: Txokolate pipitadun gaileta bigunak

Blondiea

Sukaldaritzarekin lotutako argazkigintzaren fan bilakatu naiz. Sukaldean sartuta egotea betiko gauza da baina argazkigintza berria da niretzat. Zortea izan dut, senarrari betidanik gustatu izan zaiolako, bada,  aditua daukat etxean. Gogoratzen dut gurasoen etxean gela iluna zuela eta bertan errebelatzen zituela argazkiak. Eskura ditut, beraz, kamera, objektibo, tripode, eta bestelakoak baina mota honetako argazkigintzan- food styling deritzonean- argazkietan azaltzen diren elementuak ere berebiziko garrantzia dute, platerak, edalontzi, koilara, ehun, paper..., beraz, oporretan aprobetxatzen dut gauzak erosteko; Portugalera goazela ba zeramika fabrika batera joan, Frantzian lapiko merkerik dagoen begiratu, askotan sartzen naiz dendetan koilara bakar bat erostera. Hemen faltan botatzen ditut Ingalaterrako bigarren eskuko denda eta enkanteak, gainera,  han garrantzia handia ematen diotenez "china" edo portzelanari benetako altxorrak aurkitu daitezke.

Gaurko errezeta Browniaren lagun zurbila da, Blondiea. Desberdintasun nagusia da Brownieari kakao-hautsa botatzen zaiola, Blondieari, berriz, ez. Potentea da, baina zatitxo bat probatuta bizitza politagoa ikusiko duzu.

Neurtzeko koilara eta katiluak erabili ditut, gaur egun oso erraz aurkitzen dira.

Errezeta: Blondiea

Osagaiak

2 arrautza

½ katilu gurin (urtuta egon behar du)

1 eta ½ katilu irin

1 eta ½ katilu azukre beltz

1 koilarakadatxo banilla esentzia

½ koilarakadatxo legami (royal motakoa)

Gatz apur bat

½ katilu txokolatezko pipita

½ katilu kakahuete

Prestaketa

1. OSAGAIAK NEURTU

Labea piztu 180 graduan. Osagaiak neurtzeko modu asko daude, oraingoan taza eta koilarekin neurtu dugu. Gaur egun erraz aurkitzen dira eta zenbakiak ez dakizkiten haur txikiekin sukaldean aritzeko aproposak izan daitezke. Errezeta amerikarretan erabiltzen dute neurtzeko modu hau.

2. NAHASTU

Katilu handi batean irabiatu arrautzak, azukrea, banilla esentzia eta urtutako gurina. Gehitu irina, legamia eta gatza eta kontuz nahastu espatula batekin.

3. GEHITU AZKEN OSAGAIAK

Gehitu kakahuete eta txokolate pipitak eta nahastu buelta gehiegi eman gabe.

4. LABEKATU

Molde lauki batera bota nahasketa eta egosi  18-20 minutuz. Utzi hozten erretilu batean. 

Ogi Irlandarra (Soda Bread)

Irlandatik dakargun errezeta honen berezitasun nagusia da oso azkar egiten den ogia dela, ez du legamirik, sodio bikarbonatoak egiten du legamiaren lana. Erreakzio kimiko bat sortzen da buttermilkarekin nahastuta (Buttermilk: esnea limoiarekin moztuta). Ogi hau  ez da oratu behar eta osagaiak nahastu eta zuzenean labera sartuko dugu (altxatzen utzi gabe). 

Ospea irlandarrek eman bazioten ere, badirudi sodio/soda hautsen erabilera ez zutela beraiek asmatu, Ameriketako indigenek lehenago erabiltzen zuten ogia egiteko. Sukaldaritza irlandarraren oinarri izan da momentu askotan ogi hau, merkea baitzen egiteko.

Gurutze bat marrazten zaio goi partean eta hainbat teoria daude honen inguruan: deabrua urrun mantentzeko egiten zela diote batzuk, beste batzuk maitagarriak ogi barrutik ateratzeko egiten zela. Azalpen arrazionalagoa ere badu, noski; gurutze hau marraztuta lortzen dugu lurruna bertatik atera eta masa labean dagoenean altxatzea.

Etxean oso gustuko dugun ogia da, batez ere, gosaltzeko. Oso azkar egiten denez ez dago planifikatu beharrik. Gainera, ogia eta bizkotxoaren arteko zerbait da, ez ogi-ogia ezta bizkotxoa ere, zaila azaltzeko, probatu eta ikusiko duzue!

Betsio asko ditu, gozoagoak eta gaziagoak. Etxean asko probatu ditugu baina gaurko hau gogokoenen artean dugu.

Errezeta: Ogi Irlandarra (Soda Bread)

Osagaiak:

Limoizko Madalenak

Hamabostero Puntua aldizkarirako errezeta bat prestatzen dut. Errezeta, "Handitzen, handitzen" haurrei zuzenduriko atalean agertzen bada ere, saiatzen naiz familia osoarendako erakargarria egiten, hau da, erraza, polita eta gozoa. Ondo dago haurrak sukaldean parte-hartzea eguneroko lanetan, letxuga garbitu, mahaia jarri, beraiek nahi duten heinean. Hala ere, nire proposamena da zerbait berezia egitea familian, adibidez, larunbat goiza hartzea errezeta egiteko. Ikasteko modu paregabea da, erosketa zerrenda egin, osagaiak erosi, neurtu, pixatu, nahastu, argibideak jarraitu eta nola ez, eskuak orean sartzearen plazerra ere hor dago. Eta egindakoa jatea eta lagun eta familiakoei banatzea? Hori zatirik onena!

Gaurko errezeta oso erraza da eta pausuak ondo jarraituta ezin da gaizki atera. Askok esan didate egin eta asko gustatu zaiela, hemendik mila esker, egiteagatik eta kontatzeagatik, nolako poztasuna ematen didan zuen berri izateak!

Cheddar eta Erromero Gaileta Gaziak

Duela gutxi belar aromatikoak erosi nituen balkoian landatzeko. Ez naiz oso habila landareak zaintzen baina sukaldeko errezeta desberdinak egiteko ezinbesteko osagaia dira nire ustez. Nire inguruan ez dugu ohiturarik izan belar hauek erabiltzeko (gehienez perrexilla), zentzu horretan, agian, inguruan pixkat itxiak garela antzeman dut, hala ere, orain hasi gara belar aromatiko hauek erabiltzen sukaldean eta beste grazia bat hartzen dute jakiek.

Gaurko errezeta perfektua da otordu artean, kopatxo ardo zurirekin edo garagardoarekin hartzeko. Gailetak mozteko erabili dugun moldea oso txikia da, kasu honetan, mokadu txikiagoa izatea egokiagoa iruditu zaigu.

Truko batzuk: 

- Momentuan birrindutako gazta erabiltzean gailetak zapore hobea izaten dute, beraz, aurretik birrindutako gazta erosi beharrean, komeni da gazta zati bat erosi eta zuk zeuk birrintzea.
-  Belarrak freskoak erabiltzen ditugu, niri ez zaizkit gustatzen kristalezko potetxo horietan saltzen dituztenak.
- Neurtzeko koilarak eta katiluak izatea gomendatzen dizuet, errezeta asko horrela neurtzen baitira, ez dira garestiak eta gaur egun erraz aurkitu daitezke.
- Erabili dugun arrabolak neurriak ditu, hau da, zentimetro bat, zentimetro erdi...horrela gailetak nahi dituzun lodieran egin ditzakezu

Masusta gorri eta Mascarpone urtebetetze pastela

Gure alaba txikiak bost urte bete ditu eta ospatzeko meriendatxo bat ospatu genuen etxean. Ez nuen konplikatzerik nahi, beraz, gauza errazak prestatu genituen. Pastela gurean beti da garrantzitsua, saiatzen gara desberdina egiten, gainera, alabarekin adostu behar izan  nituen osagaiak eta tartaren koloreak. Nire urtebetetzean eta gabonetan, normalean, sukaldeko gauzak eskatzen ditut; lapiko, liburu, amantalak eta baita osagai bereziak. Gabonetan masusta gorri (frambuesa) pasta eskatu nuen, badu mermeladaren antzik baina azukre gabe (edo gutxikin) eta oso kontzentratuta dago fruta bertan. Hau erabili nuen pastela egiteko eta honek eman dio kolore larrosa polit hori. Kanpotik mascarpone gaztarekin egindako frosting-a erabili genuen, azkenik, dekoratzeko masusta gorri batzuk besterik ez; "gutxiago gehiago da" esamoldearekin guztiz ados bainago. Pastel honek zapore freskoa baina fina du, koko birrindu/masusta nahasketak oso ongi funtzionatzen du. Itxurari dagokionez, pastelari begirada bat eman ostean hitz bat datorkit burura: UDABERRIA

Kanela (eta espelta) kiribilak-Cinnamon Rolls

Aspaldi nuen bideo bat egiteko gogoa. Egia esan, niri bideoak gustatzen zaizkit ikusteko, egile batzuk artista hutsak dira eta janarien argazkiak ikustea gustuko dudan bezala, bideoak ikustea ere atsegin dut. Hala ere, errezeta bat egiteko, nahiago dut idatzizko errezeta jarraitzea eta listo. Esperientzia gutxi baduzu sukaldean edo zure ikasteko modua bisualagoa bada, errezeta-bideoak euskarri aparta dira. Zenbat gauza ikasi ditugun etxean youtubeko bideoak ikusten! (mahai bat egiten, bideoa egiten, argazkiak ateratzen, telebista konpontzen, poltsikoko telefonoaren pantaila aldatzen...). Beraz, nik ere zor nuen, gutxienez, bideo bat.

Gaurko errezeta luze samarra da (ogiarekin gertatzen da, bere denbora behar du) baina ez da batere zaila eta benetan merezi du! Trukotxo batzuk ongi egiteko: gurina eta esnea aurretik berotu eta hozten utzi behar dituzu, beraz, arratsaldean egin behar baduzu errezeta, saiatu hau goizean edo, gutxienez, pare bat ordu lehenago egiten. Legami likidoa egiteko: nahastu koilarakada azukrerekin eta 30-60 segundutan likidoa izango da. Arrabolarekin laukizuzena egin behar duzu, ez da erraza hasieran, joan eskuekin forma ematen eta arrabolarekin oratu, eskuekin forma eman, arrabolarekin oratu eta horrela jarraitu, azkenean lortuko duzu. Ogia eginda dagoela jakiteko, askotan haragi termometroa erabiltzen dudan arren, beste modu bat da kolpetxoak eman ogiaren azpikaldean eta huts-soinua antzematen bada, ongi egosita dagoela esan nahi du.

Apple Crumble

Nire errezeta liburuan, hau da, eskuz idazteko Moleskine errezeta liburuan, ez ditut errezeta asko apuntatuta, normalean Evernote edo antzeko aplikazioak erabiltzen ditut errezeta interesgarriak gordetzeko. Koaderno beltz horretan daudenak, aldiz, gogokoenak ditut: oso ongi ateratzen zaizkidanak, asko pertsonalizatu ditudanak edo norbaitek pasatako "errezeta sekretua" dira. Ba Apple Crumble hau duda barik koaderno horretan apuntatuko dut. Aspaldi ez nintzen hunkitzen postre batekin, baina emozionatu egin nintzen probatu nuenean. Emozionatu? Postre batekin? Ba bai. Gainera, ospea hartu zueneko testuingurua itzela da: pentsa, bigarren mundu gerra, hau da, WW2-Britainia Handia, arrazionamendu-liburuxkak, bertan zituzten osagaietariko batzuk: arrautzak, irina, azukrea eta gurina. Sagarrak Ingalaterran barra-barra, noski. Ba hori da apple crumble-a ez da ezer eta hala ere, it's heaven!

Marrubizko Petit-Suisseak

Aspaldiko! Abandonatuta izan dut bloga azkeneko hilabeteotan. Lan-kontuak medio, liatuta ibili naiz. Urte askotan beste kontu batzuetan lanean ibili ondoren, irakasle langabetua naiz orain eta ordezkapenak egiten ditut; hasierak beti zailak izaten dira, gauza berri asko, ikasle berriak, irakasgai berriak, ba orain hasiera fase horietan egotea tokatzen zait, eta pozik gainera!