Irlandatik dakargun errezeta honen berezitasun nagusia da oso azkar egiten den ogia dela, ez du legamirik, sodio bikarbonatoak egiten
du legamiaren lana. Erreakzio kimiko bat sortzen da buttermilkarekin nahastuta (Buttermilk: esnea limoiarekin moztuta). Ogi hau ez da oratu behar eta osagaiak nahastu eta zuzenean labera
sartuko dugu (altxatzen utzi gabe).
Ospea irlandarrek eman bazioten ere, badirudi sodio/soda hautsen erabilera ez zutela beraiek asmatu, Ameriketako indigenek lehenago erabiltzen zuten ogia egiteko. Sukaldaritza irlandarraren oinarri izan da momentu askotan ogi hau, merkea baitzen egiteko.
Gurutze bat marrazten zaio goi partean eta hainbat teoria daude honen inguruan: deabrua urrun mantentzeko egiten zela diote batzuk, beste batzuk maitagarriak ogi barrutik ateratzeko egiten zela. Azalpen arrazionalagoa ere badu, noski; gurutze hau marraztuta lortzen dugu lurruna bertatik atera eta masa labean dagoenean altxatzea.
Etxean oso gustuko dugun ogia da, batez ere, gosaltzeko. Oso azkar egiten denez ez dago planifikatu beharrik. Gainera, ogia eta bizkotxoaren arteko zerbait da, ez ogi-ogia ezta bizkotxoa ere, zaila azaltzeko, probatu eta ikusiko duzue!
Betsio asko ditu, gozoagoak eta gaziagoak. Etxean asko probatu ditugu baina gaurko hau gogokoenen artean dugu.
Errezeta: Ogi Irlandarra (Soda Bread)
Osagaiak:
300 gr esne
2 koilarakada limoi-zuku
450 gr gari-irin
50 gr olo-maluta
25 gr mahaspas
25 gr intxaur
15gr sodio bikarbonato
5 gr gatz
25 gr ezti
10 gr olio
Prestaketa:
1. OSAGAIAK NAHASTU
Labea piztu 240 graduan. Lehendabizi esnea eta limoi zukua nahastu edalontzi
batean eta utzi 15 bat minutuz. Esnea moztu behar dugu, honi ingelesez
buttermilk esaten diote. Bitartean nahastu katilu handi batean osagai lehorrak
(gari-irina, olo-malutak, mahaspasak, intxaurrak , sodio bikarbonatoa eta gatza). Gehitu
osagai lehorrei moztutako esnea eta nahastu, poliki eztia eta olioa gehitu eta
nahastu guztia egurrezko koilara batekin.
2. FORMA EMAN
Irineztatu mahaia eta atera orea katilutik. Forma borobila
eman eskuekin.
3. OREA MOZTU
Oreari gurutze formako marrak egingo dizkiogu kuter batekin. Moztu egin behar da orea bertatik
lurruna irten dadin. Amaitzeko, bota olo-maluta eta irin apur bat gainetik,
honek ukitu polita emango dio.
4. LABEKATU
Jaitsi labearen tenperatura 200 gradura eta labekatu 35
minutuz. Epeltzen denean jan.
iruzkinik ez:
Argitaratu iruzkina